YAP-ın Balakən təşkilatının sədri yol qəzasında dünyasını dəyişdi

Rayon hüquq-mühafizə orqanlarından APA-nın Şəki-Zaqatala bürosuna verilən məlumata görə, hadisə iyunun 21-də saat 19.00 radələrində Böyük Qafqaz sıra dağlarının cənub ətəyində - Balakən rayonu ərazisindəki “Qubek” dağı adlanan ərazidə qeydə alınıb. 

Balakən rayon sakini, 1985-ci il təvəllüdlü Yekəyev Elnur Həsrət oğlunun idarə etdiyi UAZ markalı, dövlət qeydiyyat nişanı olmayan avtomobil “Qubek” dağı ərazisində dərəyə yuvarlanıb. Baş vermiş qəza nəticəsində avtomobildə olan YAP-ın Balakən rayon təşkilatının sədri, 2011-ci ilə qədər Balakən Mərkəzi Rayon Xəstəxanasının (MRX) baş həkimi vəzifəsində işləmiş, 1954-cü il təvəllüdlü Uluxanov Akif Hümbət oğlu hadisə yerində keçinib.

E. Yekəyev və avtomobildə olan digər sərnişinlər - Akif Uluxanovun oğlu, 1989-cu il təvəllüdlü Uluxanov Kənan Akif oğlu və 1955-ci il təvəllüdlü Göylərov Qəhrəman Abdurzaq oğlu aldıqları müxtəlif bədən xəsarətləri ilə Balakən MRX-ya yerləşdiriliblər.

Balakən MRX-dan APA-ya verilən məlumata görə, qəza nəticəsində ağır xəsarət alan Kənan Uluxanov Bakı şəhərindəki xəstəxanalardan birinə göndərilib, digər xəstələrin vəziyyəti isə orta-ağır sayılır.

Faktla bağlı Balakən Rayon Polis Şöbəsində cinayət işi başlanıb, hadisənin baş vermə səbəbləri araşdırılır.