Zepp Blatterə "korrupsiyaya qurşanmısan" ittiham
Asiya Futbol Konfederasiyasının rəhbəri Məhəmməd bin Həmmam FİFA-nın hazırkı prezidenti Zepp Blatteri korrupsiyada ittiham edib.
Simsar.az-ın “CNN”ə istinadən verdiyi məlumata görə, bin Həmmam FİFA-nın etika komissiyasından Blatterə qarşı təhqiqata başlamağı xahiş edib.
İttihama əsasən, FİFA prezidenti Karib Futbol İttifaqının üzvlərinə ödənişlərdən xəbərdar olub və etiraz etməyib. Qətərli futbol funksionerinin fikrincə, Blatterin özü iyunun 1-də keçiriləcək yeni prezident seçkisində səs qazanmaq üçün rüşvət verib. Bin Həmmam mayın 29-da korrupsiya ittihamları ilə bağlı FİFA Etika Komissiyası qarşısında cavab verməlidir. Onun açıqlamaları həqiqətə uyğun olsa, Blatter FİFA-nın son zamanlar korrupsiya ittihamı və etika pozuntusunda adı hallanan 9-cu yüksək vəzifəli üzvü olacaq.
Qeyd edək ki, FİFA prezidenti seçkisinə düz bir həftə qalmış ali futbol qurumu 4 səlahiyyətli şəxsinə qarşı araşdırmaya başlayıb. Onların arasında Zepp Blatterin seçkidəki rəqibi Məhəmməd bin Həmmam da var.