ABŞ-ın Mayami şəhərində təlim-məşq toplanışı keçəcəklər

2012-ci il London Yay Olimpiya Oyunlarına lisenziya xarakterli döyüşlərdə iştirak edəcək Azərbaycan boksçuları – Soltan Migitinov (73 kq) və Məhəmmədrəsul Məcidov (+91 kq) ABŞ-ın Mayami şəhərində təlim-məşq toplanışı keçəcəklər. 

Lent.az-ın məlumatına görə, hər iki idmançı WSB Liqasının fərdi reytinq cədvəlində ilk yerləri tutduqlarından, olimpiadaya vəsiqə uğrunda görüşdə iştirak hüququ qazanıblar.
Azərbaycan Boks Federasiyası Çinin Quanyanq şəhərində keçiriləcək döyüşlərin peşəkar qaydalara uyğun olacağını və qarşılaşmanın 7 raund davam edəcəyini nəzərə alaraq, yığmanın üzvlərini Mayamiyə göndərməyi məqsədə uyğun sayıb. Həmin şəhərdə peşəkar boksçuların əsas hazırlıq mərkəzlərindən biri yerləşir. Orada Amerikanın ən tanınmış boks mütəxəssisləri idmançılarımıza hazırlıq keçəcəklər. Migitinov və Məcidovla birgə “Baku Fires” klubunun baş məşqçisi Həmzət Ağayev də ABŞ-a yollanacaq.


Qeyd edək ki, boksçularımız WSB Liqasında mövsüm başlamamışdan öncə də Mayamidə toplanış keçmişdilər. Migitinov lisenziya uğrunda mayın 27-də ukraynalı Segey Derevyançenko, Məcidov isə ertəsi gün italiyalı Klemente Russo ilə döyüşəcək. Boksçularımız mayın 29-da Bakını tərk edəcəklər və onlar ABŞ-dan birbaşa döyüşün keçiriləcəyi Çinə yollanacaqlar.