Nazir bildirib ki, 2009-cu ildə Azərbaycan idmançıları 619 medal qazanmışdılarsa, ötən il bu rəqəm 675 ədəd təşkil edib

“Azərbaycan qısa zaman ərzində dünyanın idman mərkəzlərindən birinə çevrilib, bizim idmançıların qazandıqları medalların sayı isə ildən ilə artır”. APA-nın məlumatına görə, bunu gənclər və idman naziri Azad Rəhimov Bakıda MDB iştirakçısı olan dövlətlərin bədən tərbiyəsi və idman sahəsində əməkdaşlığı haqqında Saziş iştirakçılarının Bədən tərbiyəsi və idman üzrə Şurasının növbəti iclasında çıxışı zamanı deyib.

Nazir bildirib ki, 2009-cu ildə Azərbaycan idmançıları 619 medal qazanmışdılarsa, ötən il bu rəqəm 675 ədəd təşkil edib, qazanılan medallardan 206-sı isə olimpiya idman növləri üzrə olub: “Bütün bunlar ölkədə idmanın, xüsusilə də olimpiya idman növlərinin inkişaf dinamikasını göstərir. Hazırda Azərbaycanda 29 Olimpiya İdman Kompleksi fəaliyyət göstərir. Yaxın zamanlarda isə daha 10 kompleks tikilərək istifadəyə veriləcək”.