Mərhumla vida mərasimi sabah Təzəpir məscidində keçiriləcək

Vyanada vəfat etmiş Azərbaycanın Avstriyadakı səfiri Fuad İsmayılovun cənazəsi bir qədər əvvəl Vyana-Bakı aviareysi ilə Bakıya gətirilib. APA-nın məlumatına görə, mərhumla vida mərasimi sabah saat 12-dən 15-ə kimi Təzəpir məscidində keçiriləcək. Dəfn mərasimi saat 15-də başlanacaq.

Xatırladaq ki, səfir Fuad İsmayılov uzun sürən xəstəlikdən sonra dünən səhər saatlarında Vyanada vəfat edib. 43 yaşında dünyaya göz yuman səfir diplomat ölkəmizin Avstriya Respublikasındakı fövqəladə və səlahiyyətli səfiri, BMT-nin Vyanadakı bölməsində, ATƏT, BMSİT, AEBA və NSTQOMT yanında Azərbaycan Respublikasının daimi nümayəndəsi, eyni zamanda, Sloveniya və Slovakiyada səfiri vəzifəsində çalışıb. 1968-ci ildə Bakı şəhərində ziyalı ailəsində anadan olan Fuad İsmayılov Bakı Dövlət Universitetinin şərqşünaslıq fakültəsinin məzunudur. “AssA–İradə” Azərbaycan Müstəqil İnformasiya Agentliyində əmək fəaliyyətinə başlayıb. 1992-1995-ci illərdə Prezident Aparatının xarici əlaqələr şöbəsində, 1998-2005-ci illərdə Xarici İşlər Nazirliyində müxtəlif vəzifələrdə çalışıb. 2005-ci il martın 7-də Azərbaycanın Avstriyada fövqəladə və səlahiyyətli səfiri təyin edilib. Səmərəli fəaliyyətinə görə 2009-cu ildə “Azərbaycan Respublikası diplomatik xidmət orqanlarının 90 illiyi (1919-2009)” yubiley medalı ilə təltif olunub.