Voleybolçu qızlara Hollandiya yığmasından zərbə

Serbiya və İtaliyada təşkil olunan qadın voleybolçular arasında Avropa çempionatının final mərhələsi davam edir. Fanat.az xəbər verir ki, bu gün pley-off oyunları keçirilib.
Xorvatiyanı udub bu mərhələyə vəsiqə qazanan Azərbaycan millisi İtaliyanın Monza şəhərində Hollandiyanı sınağa çəkib. Faiq Qarayevin yetirmələri oyuna yaxşı başlayıb və ilk setdə 25:23 hesablı qələbə qazanıblar. Lakin sonrakı üç setdə rəqibənə boyun əyən yığmamız nəticədə 1:3 hesabı ilə uduzaraq, Avropa çempionatında mübarizəni dayandırıb.
Bu yığmamızın Avropa çempionatında üçüncü məğlubiyyəti olub. Bundan əvvəl İtaliya və Türkiyəyə uduzan Faiq Qarayevin komandası yalnız Xorvatiyanı udub.
Yığmamıza qrupda 3:1 hesabı ilə qalib gələn Türkiyə isə bu gecə İspaniyanı sınağa çəkib. Türkiyə yığması bizdən fərqli olaraq qələbə qazanıb. "Ay-ulduzlular" rəqibə heç bir şans verməyib - 3:0. Türkiyə 1/4 finalda Rusiyanı sınağa çəkəcək.