İlkin xəbər təsdiqini tapmadı

Baş Dövlət Yol Polisi İdarəsi 14 sentyabr 2011-ci il tarixdə Ağcabədi rayonu ərazisində 3 nəfərin ölümü ilə nəticələnən yol nəqliyyat hadisəsi ilə bağlı məlumat yayıb.

Simsar.az-ın idarənin mətbuat xidmətinə istinadən verdiyi məlumata görə, saat 09:30 radələrində Yeni Qaradolaq kəndi ərazisində Xocalı rayon sakini 1964-cü il təvəllüdlü Nurməmmədov Yaqub Həsən oğlu idarə etdiyi “QAZ-53” markalı yük avtomobilini aşırıb.

Qəza nəticəsində sərnişinlər - Kəlbəcər rayon sakinləri 1960-cı il təvəllüdlü Hüseynova Gözəl Həsənalı qızı, 1965-ci il təvəllüdlü Bayramova Cəmilə Yusif qızı və Ağdam rayon sakini, 1975-ci il təvəllüdlü Rəcəbova Arzu Bayram qızı hadisə yerində ölüb. Xəsarət alan 2 nəfərə isə xəstəxanada ilk tibbi yardım göstərildikdən sonra buraxılıb.

Qeyd edək ki, hadisə ilə bağlı ilkin məlumatda yaralıların sayının 17 olduğu bildirilsə də, bu məlumat təsdiqini tapmayıb.