“İndi bu barədə danışmaq doğru olmaz"

Türkiyənin baş naziri, Ədalət və İnkişaf Partiyasının (AKP) lideri Rəcəb Tayyib Ərdoğan parlament seçkilərindən sonra ilk xarici səfərini hansı ölkəyə edəcəyini açıqlayıb.

Simsar.az-ın xəbərinə görə, R. T. Ərdoğan “CNN Türk”də media mənsublarının seçki kampaniyasının gedişi haqqında suallarını cavablandırıb. 

“Seçkidən sonra xarici səfərlər planlaşdırılırmı” sualını cavablandıran baş nazir səfər proqramının indidən bəlli olduğunu söyləyib: “İndi bu barədə danışmaq doğru olmaz. Amma biz adətən ilk olaraq Azərbaycanı və Şimali Kipri ziyarət edirik. Bu, bir ənənədir”.

Xatırladaq ki, Türkiyədə iyunun 12-də parlament seçkiləri keçiriləcək. Seçkidə AKP-nin yenidən qələbə qazanacağı proqnozlaşdırılır.