Müsavat funksionerində təzyiq və ürək problemi

2 aprel mitinqi ilə bağlı başladılmış cinayət işi ilə əlaqədar haqqında həbs-qətimkan tədbiri seçilmiş Müsavat Partiyası Mərkəzi Aparatının rəhbəri, İctimai Palatanın üzvü Arif Hacılının səhhətində problemlər yaranıb.

Bu barədə Simsar.az-a vəkil Əsabəli Mustafayev məlumat verib. O bildirib ki, A.Hacılının qan təzyiqi və ürəyi ilə bağlı problemləri var: “Təcridxanada davamlı olaraq həkim müayinəsindən keçir. Nə vaxt çağırırlar, həkim gəlib müayinə edir. Ancaq Arif bəyin təzyiqi stabil olmur”. 


Vəkil bildirib ki, ötən şənbə Arif Hacılı ilə görüşüb və bu barədə məhkəməyə müraciət etmək barədə məsləhətləşiblər: “Yəqin ki, məhkəməyə müraciət edəcək, Arif bəyin bu şəraitdə müalicəsinin çətin olduğunu və onun səhhətinin nəzərə alınaraq, barəsində seçilmiş həbs-qətimkan tədbirinin dəyişdirilməsini istəyəcəyik”.