Azərbaycan Beynəlxalq Bankının özəlləşdirilməsi iki mərhələdə həyata keçiriləcək

Azərbaycan Beynəlxalq Bankının (ABB) nizamnamə kapitalında dövlətin iştirak payının özəlləşdirilməsi prosesi iki mərhələdə həyata keçiriləcək.

Simsar.az-ın məlumatına görə, bunu jurnalistlərə açıqlamasında ABB-nin İdarə Heyətinin sədri Cahangir Hacıyev bildirib.

Onun sözlərinə görə, özəlləşdirmənin I mərhələsində məsləhət xidmətləri, II mərhələsində isə təkliflərin qəbulu və digər işlər nəzərdə tutulur: «Məsləhət xidmətləri dedikdə, «Pricewaterhouse Coopers» və «Salaans & Rotşeld» şirkətlərinin iştirak etdiyi konsorsium dövlətə konsaltinq xidmətləri göstərəcək. Növbəti mərhələdə isə digər bank təşkilatlarının özəlləşdirmədə iştirakı nəzərdə tutulur».

C.Hacıyev qeyd edib ki, I mərhələ yekunlaşdıqdan sonra təkliflərin qəbuluna başlanacaq. ABB xarici bankları da özəlləşdirmədə yaxından iştirak etməyə dəvət edir.

Qeyd edək ki, Azərbaycan Beynəlxalq Bankının aktivlərinin həcmi 2011-ci ilin aprelin 1-nə 4 696,638 mln. manat, kredit portfeli 2 879,706 mln. manat, o cümlədən istehlak kreditlərinin həcmi 388,885 mln. manat, depozit portfeli 1 911,060 mln. manat, o cümlədən əmanətlərin həcmi 738,860 mln. manat təşkil edib. Bankın məcmu kapitalı 514,985 mln. manat, o cümlədən nizamnamə kapitalı 240 mln. manat olub. Bankın ümumi gəlirləri I rüb üzrə 84,591 mln. manat, xərcləri 77,983 mln. manat, mənfəəti 6,608 mln. manat təşkil edib.

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur.