Simsar.az | bizi özünüzə Simsar bilin
Polad Bülbüloğlu ermənilərin təxribatı ilə bağlı Rusiya XİN-ə müraciət edib

Azərbaycanın Rusiyadakı səfiri Polad Bülbüloğlu mayın 9-da Moskvada keçirilən "Ölümsüz alay" aksiyası zamanı erməni tərəfinin təxribatları ilə əlaqədar Rusiyanın müvafiq rəsmi qurumlarına şikayət edib. Bu barədə Azərbaycanın Rusiyadakı səfirliyindən bildiriblər. "Azərbaycanın Rusiyadakı səfirliyi xəsarət alanlarla əlaqə saxlayıb və onların vəziyyəti ilə maraqlanıb. Azərbaycanın Rusiyadakı səfiri Polad Bülbüloğlu Rusiya Xarici İşlər Nazirliyi, Moskva meriyası və digər dövlət orqanları ilə əlaqə yaradaraq, başverənlərin araşdırılmasını və bu cür hadisələrin bir də təkrarlanmamasını xahiş edib", - səfirlikdən vurğulayıblar.

Xatırladaq ki, mayın 9-da Moskvada keçirilən "Ölümsüz alay" aksiyası zamanı Ermənistan və Azərbaycan gəncləri arasında kütləvi dava düşüb və nəticədə bir neçə azərbaycanlı yüngül bədən xəsarətləri alıb.

Azərbaycanın Rusiyadakı səfirliyi davanın erməni tərəfinin təxribatları nəticəsində baş verdiyini hesab edir.

Öz növbəsində, Ümumrusiya Azərbaycan Konqresinin (ÜAK) Moskva bölməsinin icraçı direktoru Şamil Tağıyev ermənilərin sıralarında Moskvadakı "Monte" döyüş klubundan olan peşəkar idmançıların olduğunu vurğulayıb.

"Bəzi ermənilər azərbaycanlıların sıralarının qarşısında qondarma Dağlıq Qarabağ Respublikasının bayrağını yelləyərək və "Artsax", "Şuşa", "Miatsum" deyə qışqıraraq gedirdi. Azərbaycanlılar qondarma respublikanın bayrağını almağa çalışanda 20-30 idmançı onlara hücum etdi", - Ş.Tağıyev bildirib.

Onun sözlərinə görə, ermənilər artıq aksiyasından əvvəl "Belorusskaya" metrostansiyası yaxınlığında toplaşaraq aqressiv əhval-ruhiyyədə olublar.

"Biz bu sahə üçün cavabdeh şəxsə yaxınlaşıb təxribatın qarşısının alınmasını istədik. Onun təlimatından sonra OMON ermənilərdən bayraqları yığışdırmağı tələb etdi və azərbaycanlılarla erməniləri 200 metr məsafəyə qədər bir-birindən araladı. Amma ermənilər yenidən bayraqları çıxarıb şüarlarını səsləndirməyə başladılar. Yürüş zamanı tərəflər arasında məsafə azaldı və qəfildən dava başladı", - icraçı direktor qeyd edib.

O, bir neçə azərbaycanlının yüngül bədən xəsarəti aldığını təsdiqləyib.(report)

10 May, 2017  13:52 Baxılıb: 1794

Bu bölmədə