Gürcüstan hökumətinin Azərbaycanda iğtişaşlar törətmək planının olması barədə yayılan xəbərlər təxribatçı qrupların işidir

Gürcüstan hökumətinin Azərbaycanda iğtişaşlar törətmək planının olması barədə yayılan xəbərlər təxribatçı qrupların işidir. Həmin təxribatçı qruplar iki ölkə arasında münasibətləri korlamaq məqsədi ilə bu məsələri irəli atır. Trend-in məlumatına görə, bu barədə şənbə günü jurnalistlərə açıqlamasında Prezident Administrasiyasının İctimai-siyasi məsələlər şöbəsinin müdiri Əli Həsənov Gürcüstan hökumətinin ABŞ-ın Bakıdakı səfirliyi ilə birgə Azərbaycanda iğtişaşlar törətmək cəhdləri ilə bağlı mətbuatda dərc edilən yazılara münasibət bildirərkən deyib.

"Bu gün Cənubi Qafqazın əhəmiyyətli hərbi geostrateji mövqeləri və bu kimi mexanizmlər Gürcüstanla Azərbaycanın əlində cəmləşib", - Həsənov deyib.

O bildirib ki, Cənubi Qafqazda həlledici sosial siyasi münasibətləri Azərbaycan dövləti və onun tutduğu yol müəyyən edir.

"Azərbaycanın Gürcüstanla birlikdə yaratdığı strateji müttəfiqlik münasibətləri şərq-qərb münasibətlərində sözün əsl mənasında bir geostrateji faktordur. Azərbaycan hökuməti ölkə başçısının rəhbərliyi altında bu istiqamətdə bütün lazımi işləri görür", - PA rəsmisi bildirib.