Hakim partiya Heydər Əliyev ideyaları ətrafında sıx birləşdiyini bir daha nümayiş etdirəcək

“Hər il olduğu kimi bu il də Yeni Azərbaycan Partiyası ümummilli lider Heydər Əliyevin anadan olmasının ildönümü münasibətilə bir sıra silsilə tədbirlər keçirəcək”.

Bu barədə məlumatı Simsar.az -a hakim partiyanın icra katibinin müavini, millət vəkili Mübariz Qurbanlı verib: “Yeni Azərbaycan Partiyasının bununla əlaqədar böyük bir tədbiri nəzərdə tutulur. Partiyanın təşkilatçılığı ilə Heydər Əliyevin doğum günü ilə bağlı konfrans keçiriləcək. Heydər Əliyev siyasəti və müasirləşmə mövzusunda keçirilən konfransda 90-dan artıq elm, siyasət, mədəniyyət sahəsində tanınmış şəxslər iştirak edəcək. Konfrans 3 bölmədə olacaq və Heydər Əliyev irsinin tədqiqi, öyrənilməsi ilə bağlı mühazirələr, məruzələr dinləniləcək”.

Mübariz Qurbanlı deyib ki, konfrans may ayının əvvəllərinə planlaşdırılıb: “Eyni zamanda Yeni Azərbaycan Partiyasının rayon-şəhər təşkilatları, partiyanın Gənclər Birliyi də bir sıra tədbirlər keçirməyi planlaşdırıb. Partiyanın Gənclər Birliyi Heydər Əliyevin doğum gününə həsr olunmuş futbol turniri təşkil edəcək”.