FİFA və UEFA sərt qərar qəbul etdi
Bosniya və Herseqovina Futbol Federasiyası (FFBH/NSBiH) FİFA və UEFA üzvlüyündən məhrum edilib.
Simsar.az-ın məlumatına görə, bu barədə FİFA-nın mətbuat xidməti açıqlama yayıb.
Avropa və dünya futbol qurumlarının rəhbərliyi Bosniya və Herseqovinadan aprelin 1-dək federasiyaya bir prezident təyin etmək tələbini irəli sürsə də, hazırda FFBH/NSBiH-ə 3 prezident rəhbərlik edir. Onlar ölkənin müxtəlif millətləri – serb, bosniyalı və xorvatların maraqlarını təmsil edirlər. İndi yerli klublar və ölkə yığması beynəlxalq yarışlarda çıxış etmək hüququna malik deyillər. Lakin FİFA və UEFA yaranmış situasiyanı FFBH/NSBiH-lə birgə müzakirə etməyə hazırdır. Ali qurumlar Bosniya və Herseqovinanın mümkün qədər tez futbola qayıtmasını arzulayıblar.
Qeyd edək ki, sanksiya müddətsizdir və problem həll olunduqdan sonra veriləcək yeni sərəncamadək qüvvədə qalacaq.