Onlar həbsdə olan partiya yoldaşlarının azadlığa buraxılmalarını istəyir

Bir qrup dindarın təşəbbüsü ilə Hicab və Hicab Məhbuslarının Müdafiə Komitəsinin yığıncağı keçirilib. 

Azərbaycan İslam Partiyasından (AİP) APA-ya verilən məlumata görə, toplantıda İslamofobiya, dindarların ortaq mövqedən çıxış etməsi məqsədilə fəaliyyət istiqamətləri müzakirə olunub. Yığıncaqda komitənin sədri Hacı Faiq Vəlizadə, Hacı Əli Əliyev, AİP-in sədr əvəzi Hacı Elçin Manafov və digərləri mövzu ilə bağlı çıxış edib.

Sonda toplantının qətnaməsi qəbul olunub. Qətnamədə İslam Partiyasının barələrində həbs-qətimkan tədbiri seçilən rəhbər üzvlərinin azadlığa buraxılması, İslamofobiyaya qarşı hökumət tərəfindən ciddi tədbirlərin görülməsi, İslam dəyərlərindən bəhs edən televiziya kanalının yaradılması, şəhvəti təbliğ edən televiziya verilişlərinin və mətbuatda materialların qarşısının alınması, hicaba qarşı təzyiqlərin durdurulması ilə bağlı tələblər irəli sürülüb, o cümlədən ölkə dindarları AİP-in keçirmək istədiyi mitinqə dəstək verməyə çağırılıb.