Azərbaycan Respublikasının Macarıstandakı səfirliyi Xocalı soyqırımının 19-cu ildönümü ilə bağlı tədbir keçirib.

Səfirliyin mətbuat xidmətindən Simsar.az-a verilən məlumata görə, şəhərin tarixi mərkəzindəki Andraşi küçəsində və Oktoqon meydanında səfirliyin əməkdaşları və Budapeşt ali məktəblərində təhsil alan azərbaycanlı tələbələr vətəndaşlara üzərində “Xocalıya ədalət!” (Juctice for Khojalu!) sözləri yazılmış köynəklər, döş nişanları, bukletlər, xəritələr, plakatlar və kiçik Azərbaycan bayraqları paylayıblar. 


İki saat ərzində maraqlanan vətəndaşlara macar və ingilis dillərində Ermənistanın Cənubi Qafqaz regionunda həyata keçirdiyi təcavüzkar siyasət, Dağlıq Qarabağ münaqişəsi, Xocalı soyqırımı, silahlı münaqişə nəticəsində Azərbaycanın məruz qaldığı maddi və mənəvi itkilər, erməni vandalları tərəfindən dağıdılan mədəniyyət abidələri və qaçqınlarının vəziyyəti haqqında məlumat verilib. Budapeşt meriyasının rəsmi icazəsi ilə keçirilən aksiya şəhər sakinlərində böyük maraq doğurub.