Hakim partiya ATƏT-in faktaraşdırıcı missiyasının obyektiv hesabat hazırlayacağına ümidlidir

“Azərbaycan ATƏT-in faktaraşdırıcı missiyasından obyektiv hesabat gözləyir. Ermənistanın işğal olunmuş ərazilərimizdə beynəlxalq hüquqa zidd əməlləri missiyanın vasitəsilə bir daha dünya ictimaiyyətinə təqdim oluna bilər”.

APA-nın məlumatına görə, bunu hakim Yeni Azərbaycan Partiyasının (YAP) rəsmi saytına açıqlamasında YAP icra katibinin müavini, Milli Məclisin deputatı Mübariz Qurbanlı deyib.
M. Qurbanlı xatırladıb ki, ATƏT-in Minsk qrupu Ermənistan-Azərbaycan, Dağlıq Qarabağ münaqişəsinin sülh yolu ilə həlli missiyasını üzərinə götürən təşkilatdır. Onun sözlərinə görə, həmsədrlər bu məqsədlə vaxtaşırı bölgəyə səfər etsə də, hələ də konkret nəticələr əldə olunmayıb: “Faktaraşdırıcı missiya ikinci dəfədir ki, bölgədə araşdırmalar aparıb. Missiya bölgədəki vəziyyəti təhlil edərək hesabat hazırlayır. Bu hesabatlar zəruridir. Çünki işğal olunmuş ərazilərimizdə Ermənistan qanunsuz məskunlaşma həyata keçirir, maddi-mənəvi abidələrimizi dağıdır, ekoloji fəlakət törədən hərəkətlərə yol verir, eləcə də, qeyri-qanuni tikinti işləri həyata keçirir. Həmçinin, Ermənistan işğal olunmuş ərazilərdə narkotiklər becərir. Bütün bunlar isə beynəlxalq hüquqa ziddir”.

M. Qurbanlı deyib ki, Azərbaycan və dünya ictimaiyyəti ermənilərin bu ərazilərdə nələr törətdiyini bilməlidir. Onun sözlərinə görə, missiyanın həmsədrlərin bölgəyə səfəri çərçivəsində açıqlanması yaxşı olardı: “Təəssüf ki, bu baş vermədi. Faktaraşdırıcı missiya hesabatını açıqlamalıdır və hesabat obyektiv olmalıdır. Əks halda, beynəlxalq təşkilatların obyektivliyinə heç bir inam qalmayacaq”.