Nigeriyada BMT binasında baş verən terror aktının qurbanlarının sayı 18-ə çatıb

Nigeriyanın paytaxtı Abuca şəhərində BMT-nin nümayəndəliyi ərazisində cümə günü baş verən partlayışın qurbanlarının sayı 18 nəfərədək artıb. Bu barədə "Farns Press" agentliyi yerli polisə istinadən məlumat verib.

"Bundan əvvəl 10 nəfərin həlak olması barədə məlumat verilmişdi", - RİA Novosti yazır.

Partlayışı kamikadze törədib. O, BMT binası yaxınlığında minalanmış avtomobili partladıb. Bu məlumat hələ ki rəsmən təsdiq edilməyib. Beynəlxalq təşkilatın və Nigeriya polisinin nümayəndələri yalnız BMT missiyasının binasında hansısa partlayıcı qurğunun işə salınması barədə məlumat veriblər.

"Assoşieyted Press" agentliyinin məlumatına görə, terror aktı nəticəsində ABŞ və digər ölkələrin səfirliklərinin yaxınlığında yerləşən BMT missiyasının üçmərtəbəli binasının bir hissəsi dağılıb.